Қарағанды мемлекеттік индустриялық университеті мамырдың 16-сы күні «Қазақ әліпбиін латын графикасына көшіру: орфография мәселелері» атты әдістемелік семинар өткізді.
Семинарға Нұр-Сұлтан қаласынан ҚР Үкіметі жанындағы Қазақ тілі әліпбиін латын графикасына көшіру жөніндегі ұлттық комиссияның орфография бөлімінің жұмыс тобының мүшесі, Л.Н. Гумилев атындағы Еуразия ұлттық университетінің  профессоры, филология ғылымының докторы Жақыпов Жантас Алтайұлы және А. Байтұрсынұлы Академиясының ғылыми кеңесшісі, Л.Н. Гумилев атындағы Еуразия ұлттық университетінің докторанты Амандықов Олжас Мейрамұлы арнайы қатысты.
Семинардың тыңдаушылары университетіміздің профессорлық-оқытушылар құрамы және Теміртау қаласының  колледждері, мектептерінің қазақ тілі мен әдебиеті пәндерінің мұғалімдері болды.
Семинарда дәріс оқыған проф.  Ж.А. Жақыпов латын қарпіне көшірудің жалпы мәселелерін баяндай келе, кейбір даулы сұрақтарды ғылыми-теориялық тұрғыдан түсіндіре отырып, алдағы міндеттер және оны жүзеге асырудың тетіктеріне кеңінен тоқталды. Сонымен қатар мектеп оқулықтарындағы синтаксиске байланысты кейбір олқылықтарды атай отырып, оны оқыту барысында ескерілуге  тиісті мәселелерді атап көрсетті.
Қазақ әліпбиін латын графикасына көшіру бойынша нақты сұрақтар жайында сөз алған докторант О.М. Амандықов латын қарпінде жазылған мәтінді жедел оқып әрі жазып үйренудің, жаттығудың тәсілдеріне тоқтала келіп, шетел тілінен енген сөздердің жазылу емлесін түсіндірді. Соңынан семинарға қатысушылар латын қарпімен жазылған мәтіндердің оқылымы мен жазылымы бойынша практикалық жұмыстар орындады.  Қойылған сұрақтарға жауаптар берілді.
Семинар барысында университетіміздің «Қазақ, орыс және шетел тілдері» кафедрасының меңгерушісі, филол.ғ.к., доцент Нұрзия Әбдікәрімқызының жоғары оқу орындарының техникалық бағыттағы мамандықтарына арналған «Қазақ тілі» оқу құралының тұсаукесер рәсімі өткізілді. Өз кезегінде Н. Әбдікәрімқызы осы оқулықтың 8 жылдық еңбек тәжірибесінің жемісі болып т абылатындығын және бұл өңделіп, толықтырылған 2-ші басылым екенін айтты. Және де өзінің ғылымдағы ұстазы Жақыпов Жантас Алтайұлына  осы рәсімге куә болып отырғаны үшін алғысын жеткізді.
Семинар соңында ҚМИУ ректоры Жаутиков Бахыт Ахатовичтың атынан семинарға арнайы келген қонақтарға Алғыс хаттар тапсырылып, семианр тыңдаушыларына сертификаттар табысталды.

ҚМИУ баспасөз қызметі

Ұлы Отан соғысындағы Жеңіс күнімен шын жүректен құттықтаймын!  Бұл – Отан қорғаудағы өшпес ерлік пен өлшеусіз даңқтың, халқымыздың шексіз қаһармандығы мен мұқалмас қажыр-қайратының ең айтулы мерекесі.  Аға ұрпақ пен жас буынның Отанымызды қорғап, қызметте айтулы үлес қосқанын біз әрқашанда мақтан тұтамыз. 
         Еліміздің өркендеуі жолында атқарып жатқан игі қызметтеріңізге табыс, отбасыларыңызға амандық, дендеріңізге саулық, мол бақыт және бейбіт ғұмыр тілейміз.  Біздің тәуелсіздігіміз бен тұтастығымызды, тыныштығымыз бен бейбіт тірлігімізді қас қақпай күзетіп тұрған, халқымызға қорған болған ұлттық әскеріміздің айбыны арта берсін! 

Б. Жаутиков

Қарағанды мемлекеттік индустриялық

    университетінің ректоры

29-30 сәуір аралығында Жеңіс күніне арналған Теміртау қаласының колледж студенттері арасында баскетболдан қала чемпионаты өтті. Іс-шараны “Теміртау қаласының дене шынықтыру және спорт бөлімі”ММ ұйымдастырды.

Жарысқа Теміртау қаласының барлық колледждерінен 6 команда қатысты. Ойыншылар жақсы спорттық дайындықтарын көрсетті. Барлық ойындар өте қызықты болды, жанкүйерлер белсенді, ал күрес табанды.

Осы чемпионаттың нәтижесі бойынша ҚМИУ техникалық-экономикалық колледжінің студенттері 1-ші орынға ие болды. Топ құрамында:

Тлемисов Данияр – МЧМ-16к тобы;

Келлер Иван – ВТИПО-16 тобы;

Голиков Виталий – СЗС-16 тобы;

Грищенко Данил – Т-18 тобы;

 Бурляев Виталий – Т-18 тобы;

Волошидский Иван – Т-18 тобы.

Біздің студенттерді жеңістерімен құттықтаймыз, оларға алдағы уақытта табыс тілейміз!

ҚМИУ баспасөз қызметі